قصيدة: “شو طرابلس؟”للأستاذ: أنطوان عكّاري

بالبال قّصّة إسمها لبنان
وطرابلس كانت لها عنوان
قبل الحرب… ومشارف السبعين…
ولْ صار فينا… كان يا ما كان:
” إبقا صبي زغير بهاك الدكان
ويبقو الناس السبت معجوقين
وواقفين رجال مع نسوان
كتار عمرن صار شي تمانين
وكتار صارو بعالم النسيان
بتقول ضيعه بيقلب دكّان…

قلاّ يا إمّي ليش مجتمعين
هالناس صرلن ساعتين زمان؟
تقلّي يا إبني الكلّ منتظرين
بولياس يرجع حامل ومليان
نزلو سوا عا طرابلس عالسوق
هوّي وبدوي مع سعد شيبان
هلّق بيطلّو، حاج تسأل روق
نص ساعه…. بينتلي الدكّان

شو طرابلس يا مّي؟ بعيده كتير؟
بسمع فيا وإسما عا كلّ لسان
تقلّي بيقولولا البلد, وكبير
عا بلادنا فضلا، وعا كلّ إنسان

شو طرابلس؟ إمّ الفقير وكلّ
يلّي ابتلو بالفقر والحرمان
لْ مهما الزمان يجور بدّو يضلّ
إلهن بعد اللّه البازركان

شو طرابلس؟ هيّي دوا الموجوع
المحرور والمحروق والتعبان
تا ما يقضّيها وجع ودموع
ينزل لعند الفرمشي سلطان

شو طرابلس؟ طعم الحلو المشهور
ومعروف إسمو بكلّ هالبلدان
الحلاّب والعرجه وقهوه تفور
بقهوة فهيم ويعبق الدخّان

شو طرابلس؟ شطّ الحلا المجنون
ورمل ناعم بالشمس شعلان
زرقة المينا وريحة الليمون
وحمّص وفول وفتّة الدنّون
الألعاب والأعياد والألوان

شو طرابلس؟ مهد العلم والنور
طرابلس الفرير والطليان
وروضة الفيحا التربيه التعليم
الروم اللعازاريّه الأميركان
وصروح ما بتحتاج للتقييم
ربّت صبايا وعلّمت شبّان
وأعرق مدارس خرّجت طلاب
وأقدم كنايس عاليه وبقباب
وجوامع من الباب للمحراب
تحفة جمال وهندسه وعمران

شو طرابلس؟ قلعة صلا وإيمان
بعيد الفصح يبقو وبالميلاد
دولة رئيس يعيّد المطران
وبالفطر والأضحى وهنا الأعياد
بدارة المفتي يعيّدو الرهبان

شو طرابلس؟ صوت الصلا المسموع
أرض التعايش ملتقى الأديان
وفيها لْ بيحبّو محمّد ويسوع
عاشو سوا طول العمر إخوان
وبطرك لْ عند الشيخ وقت الجوع
يرهن صليبو ويطعم الجوعان
شو طرابلس؟ غير نصرة المقهور
شو طرابلس؟ غير قلعة الإحسان
ووقت الظلم أوّل شعب بيثور
وقلب العروبه، وصحوة الوجدان