انتي فاكره نفسك_ست بقلم :هناء زغلول

الجمله اللي الراجل بيقولها لمراته اول ما يقصر في واجباته الزوجيه وتبتدي الست تلمح من بعيد في وسط الهزار … فرجولته تنقح عليه ويبتدي يحمر عنيه ومع اول مشكله يروح رزعها واحده انت فاكره نفسك ست روحي شوفي الستات بيعملوا ايه في نفسهم وبيعاملوا اجوزاتهم ازاي
انتي اللي سديتي نفسي عن صنف الحريم كلهم ..
تقوم مراته ترمي له نظره فيها تريقه.. يلحقها بسرعه ويقولها ايه يا ماما انا زي الفل والف واحده تتمناني روحي شوفي نفسك انتي … اوعي تفتكري اني فيا عيب لا فوقي لنفسك ….
وخد عندك سلسله من الاسقاطات اللي هيرميها عليها وكل عيوب الدنيا هيلبسهالها….
وكل ما الست تفكر تفتح معاه الحوار في الموضوع دا يقوم قالب التربيزه ويطلعها ست نكديه و انها كرهته في قاعده البيت … ويقوم واخد بعضه ونازل ….
عمره ما هيقدر يعترف بالحقيقه وانه فعلا عنده مشكله ولازم يدور لها علي حل وممكن يكون سببها نفسي او بسبب مرض بسيط وله علاج او عامل السن …في أسباب كتير وفي بردو حلول كتير …
بس مشكله الرجل الشرقي انه مش بيصدق ان المشكله فيه لازم تكون في الست عشان يرضي غروره
مع انه المفروض يحتوي زوجته ويحسسها بالأمان ويتقرب منها اكتر …
بجد الست مش محتاجه اكتر من الحنيه والإحساس بالأمان لو وفر لها الاحساس دا هترضي باي وضع ربنا قسمهولها ومش هتحس ان ناقصها حاجه ….
لكن معاملته انها هي المعيوبه بيزيدها عناد وتوتر والحياه بتبقي كلها مشاكل وصراع …
عزيزي الزوج زي ما الست بتوصل لسن اليأس وبتتأقلم معاه انت كمان لازم تتأقلم مع اي تغيير بيحصلك ودي سنه الحياه
عشان كده ربنا قال وجعلنا بينكم موده ورحمه لازم نود بعض ونرحم ونستحمل ظروف بعض.
الشباب مش هيدوم ولا الصحه إنما اللي هيدوم الموده والرحمه