ما في أهضم من الشعب اللبناني، خصوصا بالأرقام:
سر الأرقام المتداولة عند اللبنانيين
بعض الأرقام باللهجة اللبنانية إلها إستخدامات مختلفة وهي ٦٠ و ١٠٠ و ١٠ و ١٠٠٠ و ٧ و ٢..
على سبيل المثال:
-الرقم (٦٠): بيستخدم فقط وحصرياً في الشتائم والتوبيخ دوناً عن باقي الأرقام.
مثلاً:
(ابن ال٦٠صر..ماية)..
(ابن ٦٠ كلب)..
ما بيقولوا مثلاً ابن ٥٠ كلب..
ولا ابن ٧٠ كلب..
حصراً ٦٠ كلب فقط لا غير.
كمان بيقولوا:
٦٠ عمرك ما ترجع.
انو ٤٠ أو ٧٠ ما بيمشي الحال.
-أما الرقم (١٠٠) فيستخدم للتسليمات.
مثلاً: (يا ١٠٠ أهلا وسهلا)..
ما منقول يا ٥٠ أهلا وسهلا..
وأحياناً بيستخدم رقم (١٠٠) للمبالغة:
(١٠٠ مرة قلنالك لا تعمل هيك)..
هو بكون قايلك مرة ونص أو مرتين..
(١٠٠ مرة ناديتلك)..
هي بتكون انجأ ٣ مرات ..
-أما الرقم (١٠) فيستخدم لوصف جودة الأشياء أو الأفعال.
(الشغل ١٠ على ١٠) أو
(فتح عيونك ١٠ على ١٠) يعني انتبه..
-الرقم (١٠٠٠) يستخدم تحديداً في التهنئة.
(١٠٠٠ مبروك)..
١٠٠ مبروك ما بيمشي الحال..
حصراً ١٠٠٠..
(١٠٠٠) الحمدلله عالسلامة..
- أما الرقم (٧) بالوصف فهو ظاهرة غريبة جداً.. ويفيد الحيرة الشديدة أو البحث المتواصل والمتعب عن شيء أو شخص ما.
مثلاً:
(دخت ال٧ دوخات لحد ما لقيت فلان أو هالغرض الخ…).
كمان بيستخدم الرقم (٧) للتعبير عن النوم العميق..
(ما رح يرد عليك.. شكلو ب “سابع” نومة)..
انتبه..
لو ب “سادس” نومة كان قام عادي ورد..
بس سابع نومة، مستحيل!
- أخيراً الرقم (٢):
وهو بيعبر عن أطول مدة زمنية بالكون حسب التوقيت اللبناني، وهي (الساعتين):
(صرلو ساعتين بنفس القصة) هي بتكون ٥ دقايق..
بس الله بيطرح فيهن البركة..
(صرلي ساعتين ناطرك)..
(صرلي ساعتين عم فهمك هالشغلة)..
(هلكت، صرلي ساعتين واقف ع رجليي)..
و(بعد ناقص ألف مليون مرة)
صرت متصل فيك ألف مليون مرة..
(منقول)
