مرض فرط الحركة وتشتت الانتباه

بقلم :الدكتورة نسرين عبد الرازق عمر
دكتوراه في الصحة النفسية

س.ايه هو مرض موضوع فرط الحركة وتشتت الانتباه وهل هو موثر ع الشخصية ؟
ج.مرض فرط الحركة ونقص الانتباه او مايعرف ب ADHD مؤثر جدا علي المجتمع ومبيتشخصش بسهولة وللاسف دايما بييجي معاه امراض تانية مصاحبة بتؤدي لتفوية التشخيص الأصلي للمرض

س.زي ايه الامراض المصاحبة؟
ج.زي التوتر والقلق والاكتئاب واضطرابات الشخصية خصوصا الشخصية الحدية وزي ادمان المخدرات وغيرها كتير

س.طيب ليه مبيتمش التشخيص صح اغلب الاحيان؟
ج.لأن اعراض المرض بتتشابه مع اعراض امراض تلنية كتير زي الاندفاعية دي ممكن نلاقيها في الشخصية الحدية والتشت ممكن نلاقيه في اي مرض نفسي تقريبا لأنهم بيأثروا غالبا علي القدرات الذهنية
والعصبية ودي ممكن تكون عند المكتئب او الشخصية الوسوتسية القهرية وهكذا

س.حضرتك قولتى الشخصية الحدية كتير شوقتيني اعرف عنها؟
ج.الشخصية الحدية او مايعرف بالبوردرلاين Borderline بتكون شخصيات حساسة وعندها اضطراب في التعبير عن مشاعرها ومع الصدمات والزمن وبعض عوامل التربية او القسوة من الوالدين او احدهما او وجود خلافات كتير بين الابوين ووجود علاقات عاطفية انتهت بالفشل او الهيانة او الصدمات او غيرها ، كل دا بيكون الشخصية الحدية وبتبدأ تظهر اعراضها في ايذاء الذات زي ان تلاقي بنت بتعور نفسها او تقص شعرها او تحاول تنتحر او حتي الشخص ممكن يأذي نفسه بالمخدرات

س.هل فيه علاقة بين الAdhd والمخدرات؟

ج.طبعا ،لان المرض سببه الاساسي كيميائي وهو نقص في مادتين كيميائيتين في المخ هما الدوبامين والنورابينفرين dopamine and norepinephrine
النقص دا في الفص الامامي المسئول عن التخطيط والتنفيذ والتركيز والشخصية بوجه عام (الناصية) ، وبالتالي فالشخص بيبدأ يحاول يعوض المواد دي
ودا يستدعي اننا نعرف هي بتطلع امتي
الدوبامين مثلا بيطلع لما ناكل اكلة حلوة او نخرج خروجة حلوة وهكذا هو هرمون السعادة اللي بيطلع ف المفاجآت وطبعا ربنا خالقهولنا بيطلع بكميات معينة
انما المخدرات خطورتها انها بتطلع كمية كبيرة منه فبالتالي الشخص اللي عنده adhd بيبدأ يلحألها عشان محتاج دوبامين
هو معذور من ناحية لأنه بيعاني زي مايكون ماشي علي ايديه ورجليه في حين اللي حواليه ماشيين علي رجليهم
فبيحاول يطلع م الوضع دا
ولأنه مبيقدرش عواقب الامور وبيندفع فبيجرب المخدرات فبتعجبه وبالتالي بيكمل فيها

س.طيب مش المرض دا بيبدأ في الاطفال وغالبنا نعرف انه في الاطفال؟

ج.اه فعلا واحنا بندرس المرض وتقسيمته فهو بيقع في قسم الامراض النمائية في الاطفال ودا مبيتعالجش في الاطفال الا لو كان الاهل بيعانوا فعلا او مثقفين فعلا
لو عانوا فهيعانوا من شدة الاعراض
تلاقي الطفل مبيركزش في المدرسة وسرحان والمدرسين بيشتكوا منه وبيغلب والظته ف المذاكرة ومبيقعدش علي بعضه وكل شوية يقوم ويتحرك ويذاكر وهو بيتحرك وهكذا
فالأهل طبعا مبيستحملوش او بيقلقوا علي ولادهم فبيبداوا يدوروا ويعالجوا
والمرض في حقيقته محتاج تفهم من الاهل لحالة الطفل اولا واخيرا لأنه مريض
وف نفس الوقت محتاج تقدير لقدراته وتعلم بعض المهارات وتعليمها ليه زي ادارة الوقت وبعض المهارات الاجتماعية وغيرها ودي بنسميها جزئية تعديل السلوك

س.طيب هل المرض بييجي علي شكل فرط حركة او تشتت انتباه او اندفاعية ولا لازم ييجس ال ٣ اعراض مع بعض؟
ج.سؤالك مهم
لا مش لازم ال ٣ اعراض مع بعض
ممكن عرض واحد
وممكن علي فكرة الطفل يتغلب عليه بذكاؤه
ودا اللي بيحصل مع اغلب الاطفال الاذكياء
بتلاقي بعضهم شقي شويتين وحركته كتير انما عشان ذكي وشاطر المدرسين بيحبوه وبيعدوله شقاوته ومبيبدأش يعاني الا لما يكبر والمهام اللي عليه تكتر فميقدرش يتعامل معاها ويهندلها ويبدأ مستواه الدراسي يتدهور ويبدأ يلوم نفسه او اللي حواليه يلوموه ويتصاب بالاحباط والاكتئاب احيانا

س .حضرتك عايزة تقولى ان المرض مادام بيبدأ في الطفولة فهو بيكمل في الكبار وبالتالي بيعانوا بس مش بيكونوا متشخصين؟

ج.دا بالظبط اللي عايزة اوصله
ان المرض عشان جزء كبير منه تغير في كيمياء المخ فهو مكمل مادام متعالجش ومأخدش دوا

س.طيب بعض الاهالي بيخافوا يدوا لأولادهم دوا في السن الصغير دا؟

ج.دا تفكير خاطئ للأسف لأن زي ماقلتلك وزي ما عايز الكل يطلعوا بالمعلومة دي من ضمن باقي معلومات انهاردة ان المرض كيميائي بالاساس
وبالتالي فالشخص محتاج دواء يحفز المخ والمرونة العصبية neuroplasticity انها ترجع خلايا المخ تشتغل بطبيعتها وبالتالي مستوي المواد الكيميائية في المخ يتظبط وبالتالي الشخص يقدر يرجع لطبيعته ويمارس حياته عادي
عارفة حضرتك الشخص قبل العلاج بيبقي عامل ازاي
بيبقي كأنه لابس نضارة عليه مية او مشبرة ومش شايف كويس ولما بيبدأ يتعالج بيرجع يشوف وينعم بنعمة النظر الواضح والتفكير الواضح من غير الافكار الكتيرة اللي بتبقي بتتنطط في دماغه زي مكنة الفشار
بتلاقي العيان بعد ما العلاج يبدأ يشتغل بييجي مبسوط بحاجات ممكن الناس العادية متكونش مقدراها ومقدرة هي صعبة عليه أد ايه
مبسوك انه كان عايز مثلا يقوم من السرير يعمل حاجة عليه او يوصل في معاده او يخلص حاجة للاخر او ميأجلش وميكسلش وميترددش
حاجات كتير اوي بيعانوا منها

س.طيب هل العلاج كله دوائي؟

ج.لا طبعا
انا بقول لاي عيان انه محتاج يعمل ٣ حاجات
١.ياخد الدواء بعد ما يشرحله كل ده
٢.يتعلم اكتر عن مرضه
كان في جملة قالها دكتور اسمه راسيل باركلي في محاضرة موجهة لاولياء امور الadhd بترن في دماغي كل شوية
Own your adhd
بمعني اتحكم فيه
المرض دا اصله كله محتاج ادارة وتعلم شوية مهارات
ولما الشخص بيتعلمها بيقدر يكمل بعدها عادي وممكن كل فترة ياخد الدوا يعوض نقص المواد الكيميائية اللي عنده

س.الدوا بيتاخد مدة أد ايه وهل زي ما الناس بتقول ان الادوية النفسية ادمان؟

ج كالعادة لأ طبعا
الدوا اولا بيتاخد مدة لاتقل عن ٦ شهور
وممكن المريض يحتاجه مدة اكبر حسب عمره وحسب مدي شدة الاعراض
والجميل ان فيه نوعين من الدوا
نوع منهم ممكن يتوقف اصلا في اي وقت ومش محتاج حتي نوقفه بالتدريج مع ان يفضل اننا نتعامل بالتدريج في اي ادوية نفسية بشكل عام
انما الدوا دا من ميزاته كدا
والحمد لله بيبني مستوي المواد الكيميائية في دماغ العيان مع الوقت والعيان بيتحسن
هو بيحتاج بس مدة زي كل ادويتنا عشان يشتغل ويوصل لأحسن نتيجة تنصح الناس اللي شاكة في نفسها او اللي حواليها في الدايرة القريبة تعمل ايه سواء اولادهم او اخواتهم او كدا

انصحهم بالتوجه لمتخصص في الصحة النفسية
المرض دا زي اي مرض ليه اختبار للكبار والصغار
التشخيص والاحصاء وهو مرجع فيه اعراض الامراض النفسية كلها وبنرجعله بحيث لو المريض عنده عدد معين من الاعراض حسب كل مرض بنشخص زي اي فرع تاني في الطب
فاللي شاكك في نفسه او اولاده في العيادة عندنا متخصصين علي اعلي مستوي وبنعمل اختبارات لكل العيانين عشان نبقي شغالين معاهم بشكل علمي وبنتابعهم وبنتابع اعراض المرض وصلت لإيه عند كل واحد ونشخص صح من الأول ونعالج علي أساس علمي سليم
لأن كل مريض بيحتاج اننا نفصله الخطة العلاجية حسب مرضه ووضعه وشخصيته
كل مريض متميز في حد ذاته
وكل واحد عنده ظروف معينة
عاوزة اقول كلمة اخيرة للتفاؤل
المرض دا اختلاف مش مرض
اصحابه عندهم مميزات زي ماعندهم عيوب
يمكن دي حاجة بنغفل عنها كتير واحنا بنتكلم عن المرض ودا بيدي وصمة لأصحابه
بيكونوا مبدعين علي فكرة جدا ورومانسيين وقلبهم ابيض وطيب وبينسوا وتلقاءيين وجدعان وغيرها من السمات الحلوة
وبنصح كل واحد اتشخص بالمرض دا انه يركز علي نقط قوته ويستثمر فيها ويدير نقط ضعفه ويستعين بالمتخصصين