اتركوا الباب موارب بقلم:الدكتورة جيهان عبد الله \ أستشاري الصحة النفسية

معرفش ليه كانت بتكرهني من غير سبب أو يمكن اعرف مين السبب اللي كرهها فيا أو بمعني اصح جارة هي اللي كرهتها فيا بس هيفيد بايه و هي صاحبة محل جنبنا ومفيش اي تعامل ليا معاها اصلا بس كنت موجوعة اوي بسبب جارتنا دي اللي شوهت صورتي وخلتها تبصلى شذرا في الرايحة والجابة بس كان عندي أمل أن هيجي يوم وتعرفني عن قرب تتغير الصورة عدت الايام ونسيت أو حاولت اتجاهل الموقف كل ما اعدى مبصش أو امشي ف اتجاه بعيد عنها لحد في يوم عملت عملية كبيرة وهي في نفس التوقيت بردوا عملت عملية وكان اللقاء بالصيدلية واحنا بنشتري دوا كنت وقتها مش قادرة اقف من التعب والدكتورة صاحبة الصيدلية صديقتي وانا قاعدة معاها تطمن عليا دخلت هي بصراحة صعبت عليا وبتلقائية قومت من ع الكرسي علشانها مكنش فيه غير كرسي واحد بس وقتها عرفت انها عملت عمليه خطيرة وهي كمان لقتها عارفة اني عملت عملية فضلت اواسيها وهي تعيط وجعت قلبي بس ع اد وجع قلبي فرحت أنها أصبحت تشوفني صح ومن يومها وانا بعدي عادي من قصاد محلها بل بتعمد اعدي عليها اطمن وأسأل واعرض عليها لو اقدر اساعدها بأي وسيلة كانت بتبكي كل ما اكلمها وكأنها بتأنب نفسها كان نفسي اقول لها انا عارفة أن فلانة السبب وانك ندمانة لما عرفيتي صح بس ولا مرة تجرأت من لين أسلوبها ورقة وعذوبة دعائها ليا في الرايحة والجابة لحد ما لقيتها غابت فترة وظهرت اخيرا لقبت حالتها تدهورت كانت دائمة السؤال بمنتهي الحب والود واجمل الدعوات وفي مرة بسبب كورونا والحظر في الموجة الاولي غبت وغابت كتير وعادت الحياة ولكنها لم تعود غابت هذه المرة قلقت سألت عليها العاملين بالمحل أشاروا لي ع لافته مكتوب عليها عزاء في وفاتها بكيت بكاء شديد ودعيت لها وافتكرت دعواتها ووجهها الصبوح وهي بتدعيلي وع اد كده فرحت أنها توفيت بعد ما عرفنا بعض صح واننا بقينا أصحاب كل يوم بعدى علي المحل افتكرها وادعي لها كتير ربنا يرحمها ويغفر لها ويرزقها الفردوس الاعلى مش منقولة على فكرة دي فعلا حصلت ليا
نصيحة في علاقاتكم اتركوا الباب موارب