يادنيا \ بقلم الشاعرة:مني عبد الشافي

يادنيا زمان جوانا بنات
مافيش فى جمالها بنات الجن

لو ضحكة ترن العقل يجن
والقلب يرق يدوب ويحن

فساتيننا جميلة كلوش بيدور
والكعب على الاسفلت يرن

والبنسة تلم نسيم الليل
من شعر حصان يصهل ويئن

مشاعرنا حياه جنة صفوان
واملنا سحاب بالخير مايضن

وربيعنا الاخضر مالى الروح
بساتين افراح نحلها بيطن

وقمر سهران فى عيون حكايات
بيخلى شاعرنا يقول ويفن

دلوقتى خلاص يازمانا سلام
حنلم جروحنا وف روحنا نكن

حنمشى من غير ماتودعنا
ولا نستنى علينا تِمنْ