خايفة ليه … قصيدة بقلم الشاعرة:حنان إبراهيم الكاشف

وبتسألني ليه بتخافي
أنا من حقي طبعاً أخاف
كل ما احب ألقاك بتجافي
ويا ما القلب ف ظلمك شاف
……….
خايفة أحبك يوم مالقاكشي
وأبكي بحسرة قلبي عليك
وابقي اتمنى انساك ماانساكش
بعد الشوق ما ياخدني إليك .

خايفة اشتاقلك وانت قصادي
واتمناك بالحضن تاخدني
يبقى القلب عليك بينادي
وانت بهجرك بتهددني ..

خايفة اتعذب وانا باتمنى
تحفظ قلبي ف نن عينيك
تحسب إني عليك باتجنى
ولا باجيب الحق عليك ….

خايفة أسلم عمري وروحي
وآجي ف وسط السكة واتوه
مين هيداوي ساعتها جروحي
ولا هيسأل ع اللي خانوه …

خايفة تخونني ف حبي مشاعري
والقى سفينتي ف وسط الموج
واكتب قصة خوفي ف شِعْري
وانا مش لاقية لقلبي خروج

أصل الحب لازم له أمان
وانت زرعت ف قلبي الخوف
يبقى هتجني كتير حرمان
وانا قررت وبكره تشوف …
وانا قررت
وبكره تشوف
بكره
تشووووووووف !!!!
………………….
حنا ن إبراهيم الكاشف