خلف الأبواب بقلم المحامية:هناء زغلول

ناس كتير بتفتكر ان الزواج آخر محطه هيوصلوها بعد رحله الحب والخطوبه و وصولا لليله الزفاف و يتقفل عليهم باب
مش متخيلين ما وراء كل باب دي قصص وحكايات ودموع وآهات … دي بتكون بدايه الحكايه بتكتبوا فيها اول سطر
كل حكايه غير التانيه ولو ماكنش في ترابط بين ابطالها و إنسجام الحكايه هتتلغبط من أولها و هتقلب لدراما سوداء
لازم كل واحد يحاول يفهم التاني ويعرف سر مفتاح التعامل معاه مش كل الناس طريقتها واحده اكيد كلنا مختلفين عن بعض وكل ما هنقرب هنلاقي اختلافات اكتر والعيوب هتظهر
والمظهر الجميل اللي كنا بنتعامل بيه هيختفي واحده واحده بالتدريج و الوشوش هتبان علي حقيقتها…
في الوقت دا الابطال هينزلوا من علي خشبه المسرح لارض الواقع و تبدأ المواجهه الحقيقيه ….
وهيكون قدام الابطال حل واحد انهم يكملوا مع بعض بكل عيوبهم ومميزاتهم مافيش مجال للتراجع دي حكايتك ولازم تكملها وتكتب فصولها عشان تسيب ذكري جميله لاولادك وأحفادك يستفادوا منها وتكون قدوه ليهم
حاولوا تكون الحكايه جميله عشان تستمتعوا بكل فصولها هي حكايه واحده للعمر كله يمكن ماتتكررش تاني
وخليكوا دايما فاكرين الزواج بدايه الحكايه مش نهايتها